Me rastin e 1 Qershorit – Ditës Ndërkombëtare të Fëmijëve, ekipi i KosovaJob u bashkua me një iniciativë me ndikim social duke dhuruar rroba të reja dhe të përdorura për “Teshavesha”, dyqanin bamirës (thrift shop) të themeluar nga fondacioni Aksioni për Nëna dhe Fëmijë.
“Teshavesha” është një nismë që u jep një jetë të dytë rrobave, lodrave dhe pajisjeve të përdorura në gjendje të mirë, të cilat dhurohen nga qytetarët. Artikujt shiten me çmime simbolike në dyqanet e saj në Prishtinë, ndërsa të gjitha të ardhurat përdoren për të mbështetur shërbimet shëndetësore për nënat dhe fëmijët në Kosovë.
Dyqanet “Teshavesha” operojnë në lokacione të ndryshme në Prishtinë, përfshirë zonën e sheshit “Zahir Pajaziti” dhe rrugën “Adrian Krasniqi”, duke e bërë më të lehtë për komunitetin të kontribuojë dhe të përfitojë nga kjo nismë humane.
Përmes këtij donacioni, KosovaJob synoi të japë një kontribut simbolik, por domethënës, duke mbështetur misionin e “Teshavesha” që çdo blerje dhe çdo dhurim të shndërrohet në ndihmë direkte për programet e fondacionit.
Kjo iniciativë është një kujtesë e fuqishme se edhe gjestet e vogla të solidaritetit mund të kenë ndikim të madh në jetën e familjeve në nevojë.
KosovaJob mbetet e përkushtuar të mbështesë nisma që forcojnë komunitetin dhe sjellin ndryshime pozitive për nënat dhe fëmijët në Kosovë./ KosovaJob
