KosovaJob ka qenë vazhdimisht e angazhuar në iniciativa që synojnë fuqizimin e të rinjve dhe krijimin e mundësive më të mira për zhvillim profesional në Kosovë. Në këtë kuadër, platforma ka qenë pjesë e një fushate avokuese të realizuar nga SOS Fshatrat e Fëmijëve në Kosovë, e cila synon të rrisë ndërgjegjësimin për rëndësinë e vullnetarizmit dhe rolin e tij në zhvillimin personal dhe profesional të të rinjve.
Fushata është zhvilluar si pjesë e projektit “YEEP I – Fuqizimi dhe Aftësimi i të Rinjve përmes Mundësive të Reja”, i cili fokusohet në përmirësimin e qasjes së të rinjve në tregun e punës dhe në krijimin e urave mes edukimit, praktikës dhe punësimit.
Në këtë iniciativë, KosovaJob kontribuoi si zë aktiv në promovimin e vlerës së vullnetarizmit. Përmes përvojës së saj në organizimin e ngjarjeve të mëdha të punësimit, angazhimin e të rinjve dhe zhvillimin e praktikave profesionale, Gili Hoxhaj, përfaqësuese e PR-it në KosovaJob adresoi nevojnë për të fuqizuar platformën si pikë referuese e vullnetarizmit dhe që vullnetarizmi të përkrahet nga vetë kompanitë dhe të njihet edhe ligjërisht si kontribut.
Për KosovaJob, pjesëmarrja në këtë fushatë përfaqëson vazhdimin e misionit të saj për të mbështetur punësimin e të rinjve dhe për të ndërtuar një ekosistem më të fortë midis punëkërkuesve, institucioneve dhe sektorit privat.
KosovaJob mbetet e përkushtuar që të jetë pjesë e iniciativave të tilla që sjellin ndikim pozitiv dhe afatgjatë në tregun e punës dhe në fuqizimin e gjeneratave të reja në Kosovë./ KosovaJob
