Këshilltar për Sistemet Elektroenergjetike, Tregjet e Energjisë dhe Inovacionin

	 	 

Bazuar në nenet 8, 10 (paragrafi 2.2.) dhe 15 të Ligjit të punës nr.03/L-212 të Republikës së Kosovës, nenet 5 (paragrafi 1, 2, 4, 5) dhe 7 të Udhëzimit Administrativ MFPT-nr. 01/2024 dhe plotësim ndryshimit të UA 03/2024 për rregullimin e procedurave të konkursit në sektorin publik, nenet 5.3.2 dhe 7.1 të Manualit të punëtorëve si dhe nenet 6.2, 7.3 dhe 9.2 të Politikës së rekrutimit, Operatori i Sistemit, Transmisionit dhe Tregut-KOSTT sh. a. për plotësim të vendeve të lira të punës si më poshtë, shpall: 
KONKURS PUBLIK

Përmbledhje e detyrave për pozitën: Këshilltar për Sistemet Elektroenergjetike, Tregjet e Energjisë 
                                                                            dhe Inovacionin
Detyrat e përgjithshme:
Këshilltari për Sistemet Elektroenergjetike, Tregjet e Energjisë dhe Inovacionin mbështet menaxhmentin dhe njësitë profesionale të organizatës në analizimin e zhvillimeve të sistemit elektroenergjetik, modelimin dhe optimizimin e skenarëve të ardhshëm, vlerësimin e tregjeve të energjisë dhe zhvillimin e mekanizmave inovativë për integrimin e burimeve të ripërtëritshme, fleksibilitetit dhe teknologjive të reja.
Këshilltari ka rol këshillues dhe analitik, me fokus në përkthimin e analizave teknike, ekonomike dhe rregullative në rekomandime praktike për vendimmarrje, planifikim strategjik dhe reforma të tregut. 
Detyrat specifike:
Brenda kësaj detyre përgjegjësitë dhe detyrat specifike janë:
Modelimi dhe optimizimi i sistemit elektroenergjetik

Zhvillon dhe mirëmban modele të sistemit elektroenergjetik për analiza afatshkurtra, afatmesme dhe afatgjata. 
Përgatit skenarë për zhvillimin e kërkesës, gjenerimit, kapaciteteve të reja, interkoneksioneve dhe burimeve të fleksibilitetit. 
Analizon ndikimin e integrimit të burimeve të ripërtëritshme, sistemeve të ruajtjes së energjisë, automjeteve elektrike, hidrogjenit, pompave termike dhe teknologjive të tjera. 
Kryen analiza të optimizimit ekonomik të dispeçimit, adekuacisë së sistemit dhe nevojave për kapacitete fleksibile. 
Vlerëson ndikimin e skenarëve të ndryshëm në sigurinë e furnizimit, kostot e sistemit dhe funksionimin e tregut. 

Analiza e energjisë dhe tregjeve

Analizon zhvillimet në tregjet ditore, brenda-ditore, balancuese dhe të kapaciteteve. 
Monitoron çmimet, flukset ndërkufitare, kongjestionet, devijimet, kostot e balancimit dhe treguesit e tjerë relevantë. 
Përgatit analiza krahasuese me tregjet evropiane dhe rajonale. 
Vlerëson ndikimin e ndryshimeve rregullative dhe të dizajnit të tregut në pjesëmarrësit e tregut dhe në funksionimin e sistemit. 
Mbështet përgatitjen e raporteve periodike, analizave për menaxhmentin dhe materialeve për vendimmarrje. 

Reforma inovative të tregut

Hulumton dhe propozon modele të reja të organizimit dhe funksionimit të tregut të energjisë. 
Analizon mundësitë për zhvillimin e tregjeve të fleksibilitetit, pjesëmarrjen aktive të konsumatorëve dhe integrimin e burimeve të shpërndara. 
Vlerëson praktikat evropiane për agregimin, demand response, komunitetet energjetike, prosumatorët dhe shërbimet ndihmëse. 
Përgatit rekomandime për reforma që rrisin konkurrencën, transparencën, efikasitetin dhe integrimin rajonal të tregut. 
Mbështet zhvillimin e koncepteve pilot dhe mekanizmave inovativë të tregut. 

Mekanizmat për prokurimin e fleksibilitetit

Analizon nevojat e sistemit për fleksibilitet në horizonte të ndryshme kohore. 
Propozon mekanizma për prokurimin e kapaciteteve dhe shërbimeve fleksibile. 
Vlerëson mundësitë për pjesëmarrjen e sistemeve të ruajtjes, gjenerimit fleksibil, konsumatorëve aktivë, agregatorëve dhe automjeteve elektrike. 

Ndërlidhja e sektorëve

Zhvillon skenarë për elektrifikimin e sektorëve të tjerë dhe ndikimin e tyre në sistemin elektroenergjetik. 
Vlerëson potencialin e automjeteve elektrike, Vehicle-to-Grid, pompave termike, ruajtjes termike dhe hidrogjenit për ofrimin e fleksibilitetit. 
Përgatit rekomandime për planifikimin e integruar të energjisë dhe dekarbonizimin ndërsektorial. 

Mbështetja e politikave dhe planifikimit strategjik

Mbështet përgatitjen e strategjive, planeve zhvillimore dhe dokumenteve të politikave energjetike. 
Vlerëson ndikimin teknik, ekonomik dhe institucional të reformave të propozuara. 
Përgatit analiza, dokumente konceptuale, policy briefs dhe rekomandime për menaxhmentin. 
Mbështet harmonizimin me zhvillimet e tregut evropian, politikat e BE-së dhe praktikat e operatorëve evropianë. 
Identifikon rreziqe, mundësi dhe nevoja për investime që lidhen me tranzicionin energjetik. 

Menaxhimi dhe analiza e të dhënave

Mbledh, përpunon dhe analizon të dhëna nga burime të brendshme dhe të jashtme. 
Zhvillon modele dhe analiza duke përdorur Python, SQL dhe mjete të specializuara për modelimin energjetik. 
Përgatit vizualizime, tabela, tregues dhe panele analitike për raportim dhe vendimmarrje. 
Siguron dokumentimin, transparencën dhe riprodhueshmërinë e modeleve dhe analizave. 
Bashkëpunon me njësitë përkatëse për përmirësimin e cilësisë dhe përdorimit të të dhënave. 

Bashkëpunimi institucional dhe profesional

Bashkëpunon me njësitë e operimit të sistemit, tregut, planifikimit, zhvillimit, rregullativës, IT-së dhe financave. 
Merr pjesë në grupe punuese, projekte kërkimore dhe iniciativa rajonale ose ndërkombëtare. 
Koordinon analiza dhe konsultime me operatorë të sistemit, rregullatorë, institucione publike, universitete dhe organizata ndërkombëtare. 
Prezanton gjetjet dhe rekomandimet para menaxhmentit dhe palëve të interesit. 
Mbështet transferimin e njohurive dhe zhvillimin e kapaciteteve të brendshme.

Të tjera
Për më tepër ai/ajo kryen detyra të tjera të cilat kërkohen nga Kryeshefi Ekzekutiv, dhe që janë të nevojshme për funksionimin efektiv të KOSTT-it.
Kërkesat profesionale/Kualifikimet, aftësitë dhe shkathtësitë tjera:
Shkollimi:  Diplomë universitare në inxhinieri elektrike, sisteme energjetike, ekonomi të energjisë, matematikë të aplikuar ose fushë të ngjashme, studimet master/PhD në sisteme elektroenergjetike, smart grids, energji ose fushë të ngjashme përbëjnë përparësi
Përvoja e punës:  Minimum 5 vite përvojë në modelimin e sistemeve energjetike, analizën e tregut të energjisë ose zhvillimin e politikave energjetike.
Njohuritë dhe aftësitë profesionale:

 Njohuri për tregjet ditore, brenda-ditore dhe balancuese. 
 Njohuri për integrimin e burimeve të ripërtëritshme, fleksibilitetin, ruajtjen e energjisë dhe   ndërlidhjen e sektorëve. 
Përvojë në përdorimin e Python, SQL ose mjeteve të ngjashme analitike. 
Njohja e mjeteve si PyPSA, Pyomo, Gurobi, GLPK ose platformave të ngjashme përbën përparësi. 
Aftësi të avancuara në përgatitjen e raporteve, analizave dhe rekomandimeve për vendimmarrje. 
Njohje shumë e mirë e gjuhës shqipe dhe angleze.

Njoftimi me rezultatin e konkursit
Sipas udhëzimit administrativ nr. 01/2024 për rregullimin e procedurave të konkursit në sektorin publik aplikantët/kandidatët do të njoftohen pas çdo faze të zhvillimit të procesit të vlerësimit të kandidatëve.
Mënyra e vlerësimit të aplikantëve/kandidatëve 
Sipas udhëzimit administrativ nr. 01/2024 për rregullimin e procedurave të konkursit në sektorin publik (neni 13, paragrafi 2), kandidatët do t’i nënshtrohen vetëm intervistimit, kriteret e vlerësimit janë:

Intervista deri në shtatëdhjetë (70) pike;
Jetë përshkrimi (CV) deri në tridhjetë (30) pike;

Mënyra e aplikimit 
Aplikimi bëhet përmes postës elektronike (e-mail). Dokumentet duhet të ngarkohen sipas kërkesave të ︠konkursit. Pasi të dërgoni aplikimin tuaj përmes postës elektronike (e-mail) në adresën e mëposhtme, do të pranoni një e-mail për konfirmim të pranimit të aplikacionit tuaj. Nëse nuk keni pranuar e-mail-in konfirmues, atëherë shkruani në e-mail adresën punesimi@kostt.com (vetëm në rastin kur pas aplikimit nuk e keni pranuar e-mail-in konfirmues).
Dokumentet që duhet të ngarkohen dhe dërgohen si pjesë e aplikimit dhe mënyra e dërgimit të tyre:
Gjatë aplikimit për pozitat në fjalë kandidatët duhet të kenë kujdes hapat e aplikimit:

Aplikimi bëhet vetëm përmes postës elektronike (e-mail) në adresën punesimi@kostt.com 
Në e-mail për aplikim duhet të bashkangjiten (ngarkohen) dokumentet në formatin PDF si në vijim:
Aplikacionin-CV-në (ver. 4.0) të shkarkuar nga web-faqja zyrtare e KOSTT Sh. A. www.kostt.com
Dëshmia për kualifikimin profesional: Diploma universitare, e skanuar në formatin pdf dhe e bashkangjitur në e-mail. Nëse diploma është fituar jashtë vendit duhet bashkangjitur vërtetimin e nostrifikimit të diplomës apo aktin që dëshmon se diploma është në procedurë të nostrifikimit me kusht që nostrifikimi i diplomës të dorëzohet deri në momentin e nënshkrimit të kontratës së punës
Dëshmia për përvojën profesionale: Vërtetim pune (referencë) nga punëdhënësit tuaj të mëparshëm apo aktual me të cilën vërtetohet përvoja juaj për profesionin që keni. Në vërtetim (referencë) duhet të jetë data e fillimit dhe mbarimit të punësimit apo angazhimit tuaj tek punëdhënësi juaj.
Dëshmi tjera të dokumenteve sipas kërkesave dhe kritereve të konkursit publik.

KOSTT ofron mundësi të barabarta të punësimit për gjithë qytetarët e Republikës së Kosovës si dhe inkurajon kandidatët e gjinisë femërore dhe të rinjtë që të aplikojnë për këto vende pune.
Vërejtje: Gjatë aplikimit, aplikantët/kandidatët duhet të kenë gjithashtu kujdes, si në vijim:
Nëse nuk e deklaroni që anëtari i familjes suaj është në marrëdhënie pune me KOSTT, në cilëndo fazë të zhvillimit të vlerësimit të kandidatit që vërtetohet, aplikacionet-CV-të tuaja do të refuzohen.
Aplikimi i dërguar i cili nuk është në përputhje me kriteret dhe kërkesat e lart cekura të këtij konkursi, si dhe i dërguar pas afatit të paraparë nuk pranohet, ndërsa ato të mangëta ose ato që nuk janë në formatin e kërkuar më lart do të refuzohen.
Aplikacionet do të pranohen vetëm nga kandidatët, të cilët i plotësojnë kërkesat/kriteret e konkursit të shpallur në mjetet e informimit dhe në web-faqen zyrtare të KOSTT-it.
Dokumentacioni shtesë i dërguar nga kandidati pas përfundimit të afatit të aplikimit nuk mund të kërkohet dhe as të pranohet.
Kalendari i përafërt pas përfundimit të afatit të aplikimit: Për pozitat që i nënshtrohen vetëm fazës së intervistimit, intervista do të mbahet brenda pesëmbëdhjetë (15) ditëve nga përfundimi i afatit të aplikimit; brenda pesë (5) ditëve do të bëhet njoftimi final për rezultatin e konkursit, si dhe brenda pesëmbëdhjetë (15) ditëve do të bëhet lidhja e marrëdhënies së punës me kandidatin e suksesshëm. Kalendari i përafërt do të aplikohet në rast se nuk ka ankesa të cilat e pezullojnë afatin e paraparë të rrjedhës së procesit të konkursit, në pajtim me UA MFPT Nr. 01/2024 dhe ndryshim-plotësimin e tij.
Konkursi mbetet i hapur pesëmbëdhjetë (15) ditë nga dita e publikimit në mjetet e informimit dhe në ueb-faqen e KOSTT-it, përkatësisht nga data 11.09.2026 deri më 26.09.2026, ora 24:00.