Kërkesë për Oferta për Shërbime të Auditimit të Jashtëm për Periudhën 2027–2028

	 	 
KËRKESË PËR OFERTA PËR SHËRBIME TË AUDITIMIT TË JASHTËM PËR PERIUDHËN 2027–2028
Të nderuar,
Sava Sigurimi Sh.A. dhe SAVA JETË Sh.A., Prishtinë (në vijim së bashku të referuara si “Kompanitë”), pjesë e Sava Insurance Group, me seli në Slloveni (në vijim “Grupi”), janë në proces të përzgjedhjes së auditorit të jashtëm për kryerjen e auditimit ligjor të pasqyrave financiare për vitet financiare 2027 dhe 2028.
Auditimi duhet të kryhet në përputhje me Ligjin për Sigurime, rregulloret përkatëse të Bankës Qendrore të Republikës së Kosovës (BQK), Ligjin Nr. 06/L-032 për Kontabilitet, Raportim Financiar dhe Auditim, Standardet Ndërkombëtare të Raportimit Financiar (SNRF) dhe Standardet Ndërkombëtare të Auditimit (SNA), si dhe kërkesat e tjera ligjore dhe rregullative në fuqi.
Nëse jeni të interesuar të angazhoheni për këtë shërbim, ju ftojmë të paraqisni ofertën tuaj me shkrim, në përputhje me kërkesat e përcaktuara në këtë dokument.
Informata shtesë për Kompanitë mund të gjeni në faqet zyrtare të internetit:

Sava Sigurimi Sh.A.: https://www.savasigurimi.com/
SAVA JETË Sh.A.: https://www.savajete.com/


 FUSHA E SHËRBIMEVE TË KËRKUARA

Nga ofertuesi i përzgjedhur pritet të ofrojë, së paku, shërbimet në vijim:

Auditimin ligjor të pasqyrave financiare vjetore, në përputhje me SNRF-të, Ligjin për Sigurime dhe rregulloret përkatëse të BQK-së.
Auditimin e paketave raportuese për qëllime të konsolidimit të Grupit, në përputhje me udhëzimet dhe kërkesat e auditorit të Grupit.
Vlerësimin e sistemit të kontrollit të brendshëm, të menaxhimit të rrezikut dhe të funksionit të auditimit të brendshëm, në kuadër të fushëveprimit të përcaktuar për angazhimin.
Vlerësimin e pajtueshmërisë së Kompanive me legjislacionin në fuqi dhe me kërkesat rregullative të BQK-së, brenda fushëveprimit të dakorduar të auditimit.
Përgatitjen e Letrës së Menaxhmentit, me gjetjet dhe rekomandimet përkatëse, pas fazës së para-auditimit dhe pas përfundimit të auditimit.
Vlerësimin e statusit të zbatimit të rekomandimeve të dala nga auditimi i vitit paraprak.


 PËRMBAJTJA E OFERTËS

Oferta e paraqitur duhet të përmbajë informacionet dhe dokumentacionin në vijim:
2.1. Informacionet për firmën e auditimit

Prezantimin e firmës së auditimit, përvojën profesionale dhe metodologjinë ose qasjen e propozuar për realizimin e auditimit.
Kopjen e licencës së vlefshme për ushtrimin e veprimtarisë së auditimit, të lëshuar nga organi kompetent, përkatësisht Këshilli i Kosovës për Raportim Financiar (KKRF).
Informacionin mbi numrin e të punësuarve në firmë, kualifikimet e tyre profesionale dhe përvojën përkatëse, duke përfshirë jetëshkrimet profesionale (CV) të auditorëve të autorizuar dhe të profesionistëve të tjerë të përfshirë në angazhim.
Referencat për angazhimet e mëparshme të auditimit, veçanërisht përvojën në industrinë e sigurimeve dhe në institucione të tjera financiare. Përvoja në sektorin e fondeve pensionale private mund të paraqitet gjithashtu, nëse është relevante.

2.2. Ekipi i auditimit dhe ekspertiza profesionale
Oferta duhet të përfshijë:

Strukturën e ekipit të propozuar për auditim, me identifikimin me emër dhe mbiemër të anëtarëve kryesorë të ekipit dhe të ekspertëve të tjerë që do të angazhohen.
Numrin e parashikuar të orëve të punës dhe tarifat përkatëse për secilin anëtar të ekipit, sipas rolit dhe përgjegjësive të tij.
Informacion mbi përvojën profesionale të anëtarëve të ekipit në industrinë e sigurimeve dhe/ose në sektorin financiar.
Konfirmimin e disponueshmërisë së ekspertëve të teknologjisë së informacionit (TI), si dhe të ekspertëve me njohuri dhe përvojë në zbatimin e standardeve përkatëse të SNRF-ve, përfshirë IFRS 9, IFRS 15, IFRS 16 dhe IFRS 17, si dhe ekspertëve të tjerë sipas nevojës.

2.3. Tarifat dhe kushtet financiare
Oferta financiare duhet të përfshijë:

Tarifat për shërbimet e auditimit për një vit financiar, si dhe tarifën totale për periudhën dyvjeçare 2027–2028.
Ndarjen e kostove sipas Kompanive, shërbimeve të ofruara dhe, sipas rastit, kategorive të burimeve profesionale të angazhuara.
Të gjitha kostot e parashikuara për realizimin e shërbimeve, përfshirë çdo shpenzim tjetër eventual.
Vlerën e ofertës pa Tatimin mbi Vlerën e Shtuar (TVSH) dhe vlerën përfundimtare me TVSH, të paraqitura veçmas.

Çdo shërbim shtesë që nuk përfshihet në ofertën bazë duhet të identifikohet qartë dhe të paraqitet veçmas, duke specifikuar tarifën përkatëse.
2.4. Kontrolli i cilësisë
Ofertuesi duhet të paraqesë informacion mbi:

Kontrollet e jashtme të cilësisë, inspektimet ose vlerësimet profesionale të cilave u është nënshtruar firma e auditimit.
Sistemin dhe procedurat e kontrollit të brendshëm të cilësisë në nivel të firmës dhe, kur është e zbatueshme, në nivel të rrjetit ndërkombëtar të auditimit.
Çdo masë disiplinore të shqiptuar ndaj firmës ose auditorëve kryesorë gjatë tri viteve të fundit, përfshirë konfirmimin përkatës në rast se nuk ka pasur masa të tilla.

2.5. Afatet kohore për realizimin e auditimit
Ofertuesi duhet të konfirmojë se është në gjendje t'i përmbushë afatet e përcaktuara nga kërkesat ligjore dhe rregullative, si dhe nga nevojat e raportimit të Grupit.
Afatet e pritshme janë si vijon:

Raportimi për Grupin: Raporti i auditimit dhe dokumentacioni përkatës për qëllime të konsolidimit të Grupit pritet të përgatiten rreth datës 10 shkurt të vitit pasues, ndërsa data përfundimtare do të përcaktohet gjatë lidhjes së kontratës.
Pasqyrat financiare statutare individuale: Raporti i auditorit për pasqyrat financiare statutare individuale të secilës Kompani duhet të dorëzohet deri më 16 shkurt të vitit pasues.
Letra e Menaxhmentit: Drafti i Letrës së Menaxhmentit, pas përfundimit të fazës së para-auditimit, duhet të dorëzohet deri më 30 nëntor, ndërsa versioni përfundimtar duhet të dorëzohet deri më 16 shkurt të vitit pasues.

Ofertuesi duhet të deklarojë shprehimisht në ofertë se mund t'i përmbushë këto afate dhe të përshkruajë shkurtimisht mënyrën e organizimit të punës për realizimin e tyre.
2.6. Pavarësia dhe konfliktet e mundshme të interesit
Ofertuesi duhet të dorëzojë një deklaratë të pavarësisë, në të cilën konfirmon se plotëson kërkesat e zbatueshme të pavarësisë dhe etikës profesionale për kryerjen e auditimit.
Nëse firma e auditimit ose ndonjë anëtar i ekipit të propozuar ka ofruar apo ofron shërbime për ndonjë kompani të Sava Insurance Group, këto angazhime duhet të deklarohen qartë, duke përfshirë natyrën e shërbimeve dhe periudhën e ofrimit të tyre. Ofertuesi duhet gjithashtu të vlerësojë nëse këto angazhime mund të krijojnë kërcënime ndaj pavarësisë ose konflikte interesi dhe të përshkruajë masat mbrojtëse të ndërmarra, sipas rastit.

 DORËZIMI I OFERTAVE

Ofertat duhet të dorëzohen në formë elektronike, në adresat e mëposhtme:

Fatime.beshiri@savajete.com
Visar.Haxhibeqiri@savasigurimi.com
Donika.Devaja@savasigurimi.com

Afati i fundit për dorëzimin e ofertave është e hëna, 2 nëntor 2026, deri në orën 12:00.
Për informata shtesë ose sqarime lidhur me këtë kërkesë, mund të kontaktoni:
Visar Haxhibeqiri, Fatime Beshiri

E-mail: Visar.Haxhibeqiri@savasigurimi.com
E-mail: Fatime.beshiri@savajete.com

Pas pranimit dhe shqyrtimit të ofertave, ofertuesit do të informohen për hapat e mëtejshëm të procesit të përzgjedhjes.
Ju falënderojmë paraprakisht për interesimin dhe bashkëpunimin tuaj.
Me respekt,
Sava Sigurimi Sh.A. dhe SAVA JETË Sh.A.