Ekspert lokal për hartimin dhe finalizimin e Udhëzimit Administrativ për kriteret dhe kushtet për marrjen e licensës për ofrimin e shërbimeve sociale dhe familjare nga punonjësit profesional

THIRRJE PËR APLIKIM
Ekspert lokal për hartimin dhe finalizimin e Udhëzimit Administrativ për kriteret dhe kushtet për marrjen e licensës për ofrimin e shërbimeve sociale dhe familjare nga punonjësit profesional

I. INFORMACIONE TË PËRGJITHSHME
Fondacioni Terre des hommes Lausannë në Kosovë (në tekstin e mëtejmë: Tdh), është një organizatë jo-fitimprurëse që ka funksionuar për më shumë se 20 vite në fushën e të drejtave të fëmijëve dhe mbrojtjes së fëmijëve, duke udhëhequr krijimin dhe forcimin e një sistemi kombëtar për mbrojtjen e fëmijëve në Kosovë. Fusha e ekspertizës së Tdh ka të bëjë me ndërhyrjet e drejtpërdrejta psiko-sociale me fëmijët e cenueshëm dhe familjarët e tyre dhe anëtarët e komunitetit, për të fuqizuar institucionet lokale, regjionale, qeveritare, dhe aktorët kyç përmes ndërtimit të kapaciteteve dhe trajnimit në vendin e punës, për të zhvilluar dhe zbatuar struktura, politika, standarde dhe procedura të ndjeshme ndaj fëmijëve.

Tdh Kosovë ka 3 programe kryesore të ndërhyrjeve: 1) Mbrojtja e fëmijëve; 2) Migracioni dhe Anti-Trafikimi dhe 3) Drejtësia Për të Miturit.

II. INFORMACIONE RRETH PROJEKTIT

Fondacioni Terre des hommes Lausannë në Kosovë është duke zbatuar projektin "Drejtësia sociale për Romët, Ashkalit dhe Egjiptianët në Kosovë", në partneritet me organizatën Zëri i Romëve, Ashkalinjve dhe Egjiptasve (VoRAE) dhe Swiss Church Aid (HEKS/EPER).

Qëllimi i përgjithshëm i konsorciumit dhe vizioni është një shoqëri multi etnike dhe multi kulturore në Kosovë, ku pjesëtarët e komuniteteve Rom, Ashkali dhe Egjiptian trajtohen si të barabartë nga shteti dhe nga shoqëria, ku kanë qasje dhe mundësi të barabarta sikur të gjithë qytetarët e tjerë dhe ku Romët, Ashkalit dhe Egjiptianët njohin të drejtat dhe detyrat e tyre.

Përmes një sërë veprimesh avokuese, konsorciumi ka ndikuar në ndërtimin e kornizës ligjore dhe politikat e Qeverisë dhe ka ndikuar në marrjen e vendimeve që kanë avancuar përfshirjen sociale të komuniteteve Rom, Ashkali dhe Egjiptian. Duke mobilizuar bashkëpunëtorët në nivel lokal dhe nacional, konsorciumi krijoi me sukses sinergjinë e nevojshme për të rritur dhe avancuar politikat dhe integrimin institucional të intervenimeve që tashmë ishin testuar dhe zbatuar me sukses.

Në dhjetor të vitit 2023, është aprovuar Ligji për shërbime sociale dhe familjare. Ky ligj rregullon shërbimet sociale dhe familjare për personat në nevojë dhe familjet që janë në nevojë, detyrat dhe përgjegjësitë e institucioneve publike që hartojnë politika dhe ofrojnë shërbime sociale dhe familjare si dhe detyrat dhe përgjegjësitë e institucioneve private që ofrojnë shërbime sociale dhe familjare.

III. OBJEKTIVI I SHËRBIMIT

Fondacioni Terre des hommes Lausannë në Kosovë (TdhK) do të kontraktojë një ekspert lokal i/e cila ka kapacitete njerëzore, etike, profesionale dhe teknike për hartimin e Udhëzimit Administrativ për “Kriteret dhe kushtet për marrjen e licensës për ofrimin e shërbimeve sociale dhe familjare nga punonjësit profesional”, në përputhje me Ligjin për Shërbime Sociale dhe Familjare dhe standardet ndërkombëtare. Akti nënligjor rrjedh nga neni 70 (Licencimi i punonjësve profesional për marrjen e licencës) i Ligjit për Shërbime Sociale dhe Familjare, i cili përcakton se punonjësi profesional mund të pajiset me licencë për ushtrimin e veprimtarisë profesionale në fushën e shërbimeve sociale dhe familjare nëse i plotëson kriteret dhe kushtet e përcaktuara. Kriteret dhe kushtet për marrjen e licencës për ofrimin e shërbimeve sociale dhe familjare nga punonjësit profesionale përcaktohet me akt nënligjor të nxjerrë nga Ministri.
Grupi punues është themeluar me vendim nga Ministria e Drejtësisë ndërsa eksperti/ja i/e angazhuar do të jetë përgjegjës që në koordinim me kryesuesin dhe anëtarët e grupit punues të hartojë dhe finalizoj draftin e udhëzimit administrativ derisa të jetë e gatshme për aprovim nga Qeveria.

IV. PËRSHKRIMI I PUNËS

Funksione thelbësore të konsulencës

• Eksperti/ja do të kryejë detyrat e tyre në lidhje me kartën e Tdh-së dhe Politikën e Tdh-së për Mbrojtjen e Fëmijëve.
• Eksperti/ja siguron mbrojtjen morale të emrit të Tdh-së dhe e mbrojnë atë në të gjitha rrethanat dhe interesat e organizatës
• Eksperti/ja do të drejtojë aktivitetet dhe angazhimet e tij/saj pavarësisht nga bindjet politike, racore apo fetare.

Përgjegjësitë

Në bashkëpunim të ngushtë me grupin punues, eksperti/ja do të kenë përgjegjësitë në vijim:

• Hartimi i draftit të parë të aktit nënligjor – “Udhëzimit Administrativ për kriteret dhe kushtet për marrjen e licensës për ofrimin e shërbimeve sociale dhe familjare nga punonjësit profesional”.
• Dorëzimin e draftit tek grupi punues i themeluar zyrtarisht për t'u përdorur si bazë për diskutim gjatë procesit të zhvillimit të udhëzimit administrativ;
• Angazhimin e plotë dhe proaktiv në bashkëpunim me grupin punues të themeluar sipas vendimit të lëshuar nga Ministria e Drejtësisë;
• Mbështetjen e kryesuesit të Grupit Punues në lehtësimin e punëtorive;
• Pasqyrimin e komenteve të konsultimeve në përmbajtjen e udhëzimit administrativ.
• Njoftojnë dhe raportojnë lidhur me punën e realizuar tek Tdh dhe zyrtarët përgjegjës nga Ministria e Drejtësisë;
• Mbajtjen e qasjes neutrale dhe profesionale gjatë gjithë procesit;
• Kryerjen e detyrave duke respektuar statutin e Tdh-së dhe Politikën e Tdh-së për mbrojtjen e fëmijëve.

V. KOHA/AFATET
Detyra është paraparë të kryhet brenda 10 ditëve të punës brenda periudhës nga muaji mars 2024 deri në maj 2024.

* Datat vendosen pas një marrëveshjeje të ndërsjellë midis Ekspertit/Ekspertes, Ministrisë së Drejtësisë dhe Terre de hommes.

VI. KRITERET E PËRZGJEDHJES

• Diplomë universitare në drejtësi, shkenca sociale ose fusha të tjera të ngjajshme.
• Së paku 5 vite përvojë pune në draftimin e akteve nënligjore, udhëzimeve administrative, rregulloreve dhe protokolleve të punës në fushën e shërbimeve sociale dhe familjare.
• Të ketë shkathtësi të shkëlqyeshme analitike dhe konceptuale;
• Të ketë shkathtësi të shkëlqyeshme në shkrim dhe komunikim;
• Duhet të ketë njohuri të mira për sistemin e të drejtave të fëmijëve dhe mbrojtjes së fëmijëve;
• Të ketë njohuri të mira për sistemin e shërbimeve sociale dhe familjare;
• Të ketë përvojë dhe punë të dëshmuar me institucione nga sektori shoqëror dhe organizata që ofrojnë shërbime sociale;
• Duhet te ketë përvojë të dëshmuar të bashkëpunimit efektiv me institucionet publike në nivelin
• qendror dhe lokal, ofruesit e shërbimeve publike dhe OJQ-të;
  Njohuri të thella të legjislacionit të mbrojtjes së fëmijëve dhe shërbimeve sociale e familjare.
• Përvojë në udhëheqjen e grupeve punuese dhe konsultimeve me përfaqësues të institucioneve,OJQ-ve dhe bashkëpuntorëve të tjerë.
• Aftësi të shkëlqyra të të shkruarit dhe materiale të publikuara.
• Aftësi të shkëlqyeshme në koordinim, komunikim dhe organizim;
• Njohja e kontekstit në Kosovë dhe Rajon dhe përvoja praktike e punës në vend është një avantazh i fuqishëm.

Si të aplikoni?
Të gjithë të interesuarit që i përmbushin kriteret inkurajohen fuqishëm të aplikojnë dhe t'i dorëzojnë dokumentet e mëposhtme në kos.application@tdh.ch

• CV professionale në gjuhën angleze;
• Një letër të interesimit
• Metodologjinë e punës
• Ofertën financiare neto

Aplikimi për këtë shërbim do të jetë i hapur nga data 08.03.2024 deri më 21.03.2024 në orën 17:00. Ju lutemi shkruani “Ekspert/e për hartimin e UA për kriteret dhe kushtet për marrjen e licensës për ofrimin e shërbimeve sociale dhe familjare nga punonjësit profesional” në subjekt të emailit.
Ju lutemi vini re se aplikacionet e pranuara pas afatit nuk do të merren parasysh.

Kriteret e Përzgjedhjes

Politika për Mbrojtjen e Fëmijës:
Të zotohet për të respektuar Menaxhimin e Rrezikut të Tdh-së duke përfshirë: Kodin Global të Mirësjelljes, Zotimet për Mbrojtjen e Fëmijëve, Politikën Anti-Mashtrim/Korrupsion. Politikën e Sigurimit dhe Rregullorën e përgjithshme për mbrojtjen e të dhënave.

Për shkak të numrit të madh të aplikacioneve, Tdh nuk mund t'i përgjigjet të gjithëve individualisht. Ju lutemi kini parasysh se vetëm kandidatët që hyjnë në listën e ngushtë do të kontaktohen.